ၾိင်ႈထုင်းႁိတ်ႈႁွႆးတႆးတိုၼ်းမီးၵႃႈၶၼ် ပၢင်ပွႆးဢၼ်ၸတ်းၵူႈၵမ်းၼၼ်ႉ ႁႂ်ႈမီးတီႈပွင်ႇ
ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း
တႆးၼႆႉပၢၼ်သိုပ်ႇပၢၼ် ပဵၼ်ၵူၼ်းၶိူဝ်းယဵၼ်ႇငႄႈလႄႈမီးၾိင်ႈထုင်းဢၼ်လီႁၵ်ႉမႃးတႃႇသေႇ။ ၾၢႆႇၼိုင်ႈတႆးၼႆႉ ယုမ်ႇယမ်ၼိူဝ်သင်ၵေႃႈမီးလွင်ႈမၼ်ႈၵိုမ်း။ ၵွပ်ႈၼႆလႄႈ ဢိင်ၼိူဝ်လွင်ႈယုမ်ႇယမ်သေၵေႃႈမီးပၢင်ၵႅဝ်ႈ (ဢၼ်တႆး ႁွင်ႉဝႃႈပွႆး) သႅၼ်းလဵၵ်ႉသႅၼ်းယႂ်ႇ ၼၼ်ႉၵေႃႈၶႂ်ႈဝႃႈမီးၵူႈလိူၼ်။
ပွႆးသႅၼ်းလဵၵ်ႉၼႆႉ တူဝ်ယၢင်ႇမၼ်း မိူၼ်ၼင်ႇ ၶၢဝ်းၾူၼ် ၾူၼ်ဢမ်ႇတူၵ်းလႄႈႁဵတ်းပွႆးပွႆႇၼူၾႆးယွၼ်းၾူၼ် ပွႆးလၵ်ႉၶူၵ်ႉမႄႈမၢႆႈယွၼ်းၾူၼ် ။
ပွႆးယႂ်ႇသမ်ႉ မိူၼ်ၼင်ႇပွႆးဢွၵ်ႇဝႃႇ ပွႆးပီမႂ်ႇ ပွႆးသၢင်ႇလွင်း ၸိူဝ်းၼႆႉတႄႇၵႂႃႇ မီးထႅင်ႈတင်းၼမ် ။ ပွႆးဢၼ်တႆးၸတ်းၵူႈဢၼ်ၼႆႉ ဢိင်ၼိူဝ်လွင်ႈယုမ်ႇယမ်သေ မီးတီႈပွင်ႇမၼ်းၵူႈဢၼ်။ ၵူၺ်းၵႃႈ ၼႂ်းၵၢပ်ႈပၢၼ်ဝၼ်းမိူဝ်ႈၼႆႉ ဢိင်ၼိူဝ်လွင်ႈဝၢၼ်ႈ မိူင်းလူႉသေ တႆးလႆႈပၢႆႈလႆႈယၢၼ်ပိုၼ်ႉတီႈ။
ၾိင်ႈထုင်းဢၼ်ႁၢႆၵေႃႈႁၢႆ။ ဢၼ်ပေႃႇမႂ်ႇၵေႃႈမီး။ ၵွပ်ႈၼႆမၢင်တီႈ ၸတ်းပွႆးယူႇသေတႃႉ ၽွၼ်းလီလႄႈ ၽွၼ်းၸႃႉမၼ်းၶူၼ်းၶဝ်းလေႃးလႄးၵၼ် ။ ပွႆးမၢင်ဢၼ်ၸတ်းယူႇၵေႃႈဢမ်ႇႁူႉတီႈပွင်ႇမၼ်းၵေႃႈမီး။ ၵွပ်ႈၼႆ မိူဝ်ႈလႂ်မိူဝ်ႈႁဵတ်းပွႆးယူႇၵေႃႈ ႁႂ်ႈမီးၼမ်ႉတွၼ်းၽွၼ်းလီတႃႇတူင်ႇၵူၼ်း ၊ ၸင်ႇတေ ပဵၼ်ပွႆးဢၼ်မီးၵႃႈၶၼ်လႄႈ မီးတီႈပွင်ႇ ၼႆ ႁဝ်းၶႃႈထုၵ်ႇလီဢွၼ်ၵၼ်သႂ်ႇၸႂ် ။လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။
#podcast
#shannews
