ပၢင်လိူၵ်ႈတင်ႈ 2025 ၸၢင်ႈလီတႃႇသိုၵ်းမၢၼ်ႈ ၸၢင်ႈၸႃႉတႃႇၵူၼ်းမိူင်း
ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း
ၼင်ႇႁိုဝ် ၸိုင်ႈမိူင်းၼိုင်ႈလုၵ်ႈ တေၵတ်းယဵၼ်ၼိမ်တဵင်ႈၼၼ်ႉ ပိူင်လူင်မၼ်း လၵ်းသင်ႉလူင် 3 ယိူင်ႈ တေလႆႈမီးဢႃႇၼႃႇၽဵင်ႇၵၼ် တေလႆႈမီးႁႅင်းၵွၼ်းၵိူင်ႈၵၼ်လႆႈ ၼႆ ၽူႈမီးတၢင်းႁူႉၵၢၼ်မိူင်းၶဝ်ၵႆႉတူၵ်ႇလၢတ်ႈၼင်ႇၼႆ။
ၼႂ်းလၵ်းသင်ႉလူင် 3 ယိူင်ႈၼၼ်ႉ မီးဝႆႉ ၾၢႆႇႁႅၼ်းၾိင်ႈမိူင်း(ဢမ်ႇၼၼ်ၾၢႆႇပၵ်းပိူင်ၸိုင်ႈမိူင်း) ၾၢႆႇၽွင်းငမ်းလႄႈ ၾၢႆႇတတ်းသိၼ် ။ ပၢၼ်မႂ်ႇၼႆႉ ပၢႆၼပ်ႉပႃးထႅင်ႈလၵ်းသင်ႉမႂ်ႇ ဢၼ်တေၸၢင်ႈပၵ်းတႃပႂ်ႉတူၺ်း လွင်ႈၽိတ်းလွင်ႈထုၵ်ႇၶဝ်။ ၼၼ်ႉၵေႃႈ ပဵၼ်သိုဝ်ႇၶၢဝ်ႇ ။ ၸင်ႇဝႃႈ မီးၵႂႃႇ လၵ်းသင်ႉလူင် 4 ယိူင်ႈ ။ တႃႇတေမီးမႃးလႆႈ လၵ်းသင်ႉလူင်ၸိူဝ်းၼႆႉသမ်ႉ ယူႇတီႈၵၢၼ်မိူင်း မိူင်းလႂ်မိူင်းၼၼ်ႉ တၵ်းလႆႈမီးလွင်ႈပူင်ႇသႂ်။
ၵမ်ႈၼမ်တႄႉ ႁၼ်ဝႃႈ မိူင်းလႂ်မီးၵၢၼ်လိူၵ်ႈတင်ႈၵေႃႈ ပွင်ႇဝႃႈ မိူင်းၼၼ်ႉ ပဵၼ်မိူင်းဢၼ်မီးလွင်ႈပူင်ႇသႂ်။ၵွပ်ႈဝႃႈ ပႃးသဵင်ၵၢင်ၸႂ်ၵူၼ်းမိူင်းၵူၸၼ်ႉထၢၼ်ႈ ။ ပေႃးမိူၼ်ပၢင်လူၵ်ႈတင်ႈ ဢၼ်သိုၵ်းမၢၼ်ႈ တေဢွၼ်ၼမ်းၸတ်း ၼႂ်းပီ 2025 ၼႆႉသမ်ႉ တူၺ်းၵူၼ်းမိူင်းၵေႃႉလႂ်ၵေႃႈ ႁႂ်ႈပေႃးထၢင်ႇယႂ်ႇမုင်ႈမွင်းတႄႉတႄႉၼၼ်ႉ ဢမ်ႇမီး ။ ၵူၼ်းၼုမ်ႇၸိူဝ်းလဵပ်ႈႁဵၼ်းၵၢၼ်မိူင်းၶဝ်တႄႉ လၢတ်ႈဝႃႈ ပဵၼ်ပၢင်လိူၵ်ႈတင်ႈဢၼ်ဢမ်ႇမီးတီႈပွင်ႇသင် ၼႆလူးၵွၼ်ႇ ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။
#podcast
#shannews
