ပီႈၼွင်ႉၶမ်းတီႈထုင်ႉပူႇတႂ်း ၺႃးၽွၼ်းယွၼ်ႈၵၢၼ်ၶုတ်းၶမ်းမႃးၸဵမ်လႂ် ဢမ်ႇမီးၽႂ်သႂ်ႇၸႂ်
ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း
ၽႂ်မီးငိုၼ်းပဵၼ်ၸဝ်ႈ ၽႂ်မီးၶဝ်ႈပဵၼ်ၶုၼ်ၼႆၼၼ်ႉ ပွင်ႇဝႃႈ တႃႇပဵၼ်ၸဝ်ႈပဵၼ်ၸွမ်ၼႆႉ ငိုၼ်းၼႆႉ လမ်ႇလွင်ႈ ယူႇတွၼ်ႈၼိုင်ႈ ။
ၵၢၼ်ပဵၼ်ၸဝ်ႈပဵၼ်ၶုၼ်ၼႆႉ ၶတ်းၸႂ်မီးငိုၼ်းမီးၶမ်းၵူၺ်းႁိုဝ်တေယဝ်ႉ ။
တၵ်းလႆႈတူၺ်း ထိုင်ပႃးလွင်ႈယူႇလွင်ႈၵိၼ် ၵူၼ်းဝၢၼ်ႈၵူၼ်းမိူင်း ၸင်ႇႁွင်ႉဝႃႈ ၶုၼ်လီ ။
ၵူၺ်းၵႃႈ ၼႂ်းမိူင်းႁူမ်ႈတုမ်မၢၼ်ႈသမ်ႉ ၵမ်ႈၼမ်ႁႃသဵၼ်ႈတၢင်း တႃႇမီးၸၼ်ႉမီးထၢၼ်ႈ ပဵၼ်ၸဝ်ႈ ပဵၼ်ၸွမ် ၵူၺ်း ဢမ်ႇတွၼ်ႉသႂ်ႇၸႂ်တႃႇပုၼ်ႈၵူၼ်းၼမ် ။
ပွတ်းတၢင်း ၸႄႈဝဵင်းပူႇတႂ်း ၸႄႈမိူင်းၶၢင်ယၢမ်းလဵဝ် ၼႆႉၵေႃႈ ၼင်ႇၼၼ်။ ပဵၼ်ဢွင်ႈတီႈဢၼ် မီးမေႃႇၶမ်း ယႂ်ႇလူင်လႄႈ ၵူၼ်းၸိူဝ်းႁၼ်ပုၼ်ႈသုၼ်ႇတူဝ် ၵမ်ႈၼမ်ၶတ်း ၸႂ်မီးဢႃႇၼႃႇ မီးၸၼ်ႉထၢၼ်ပွတ်းၼၼ်ႉသေ ၶိုင်ပွင်ႁဵတ်းသၢင်ႈတႃႇသုၼ်ႇတူဝ် မႃးပၢၼ်သိုပ်ႇပၢၼ် ။
ပီႈၼွင်ႉတႆးလႄႈ ၵူႈၸၢဝ်းၶိူဝ်းဢၼ် ယူႇသဝ်းၼႂ်းပူႇတႂ်းမႃးၸဵမ်မိုၼ်ႉသိုၼ်းၵွၼ်ႇသမ်ႉ ၵုမ်ႇလႆႈၺႃး ၽွၼ်းယွၼ်ႈ မၼ်းလွၼ်ႉလွၼ်ႉ ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။
#podcast
#Shannews
