ၶႂ်ႈလႆႈၵုသူလ်ၵေႃႈ ၾိုၵ်းတီႈၸႂ် ယႃႇႁႃၵႆ ၊ ၽွင်းသိုၵ်းၼမ်ၼႆႉ ၵူဝ်ထူပ်းၽေး
ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း
04/07/2026
တင်ႈတႄႇ သိုၵ်းယိုတ်းမိူင်းမႃးၼႆႉသေ ၸုမ်းယိပ်းၵွင်ႈၵၢင်ႇ ၽုတ်းဢွၵ်ႇမႃးလၢႆမူႇလၢႆၸုမ်း ။ ပေႃးၵူၼ်းမိူင်းၺႃးၸုမ်းဢမ်ႇႁူႉၾၢႆႇပူၼ်ႉပႅၼ်သင်မႃးမိူဝ်ႈလႂ်ၵေႃႈ ဢမ်ႇတွၼ်ႉႁူႉဝႃႈပဵၼ်ၼမ်ႉမိုဝ်းၸုမ်းလႂ် ။ ၼႂ်းၵႄႈၼႆႉ မီးၵူၼ်းပွမ်ပဵၼ်ၸုမ်းၼၼ်ႉၸုမ်းၼႆႉသေ တင်ႈၸႂ်ၸူၼ် ၊ ႁိမ် ပူၼ်ႉပႅၼ်ၼိူဝ်ၵူၼ်းမိူင်းၵေႃႈၼမ်မႃး ။ ဢၼ်လႂ်ပဵၼ်ၸူၼ် ဢၼ်လႂ်ပဵၼ်ၸုမ်းယိပ်းၵွင်ႈၵၢင်ႇ လၢမ်းဢမ်ႇလႆႈ ။
ပွတ်းတၢင်းမိူင်းမၢၼ်ႈ ဢၼ်မီးၽြႃး ၸိုဝ်ႈလိုဝ်း ဢၼ်ၵူၼ်းမိူင်းႁူမ်ႈတုမ်မၢၼ်ႈ ဢွၼ်ၵၼ်ႁွတ်ႈထိုင်ဝႆႈသႃယူႇၵူႈပီ မိူၼ်ၼင်ႇ ၵွင်းမူး ၽြႃး တီႈဝဵင်းၵဝ်ႇၶုၼ်မၢၼ်ႈ မိူင်းပူးၵမ်ႇလႄႈ တီႈလွႆပူၵ်ႉပႃး ၸိူဝ်းၼႆႉ ၵူၼ်းၸိူဝ်းၵႂႃႇဢႅဝ်ႇယဵမ်ႈဝႆႈသႃ ၵမ်းၵမ်းၺႃး တီႉၺွပ်း ႁဵတ်းႁၢႆႉမႃးလၢႆၵမ်း ။ တေႃႇထိုင်မိူဝ်ႈလဵဝ် ပႆႇႁူႉဝႃႈ ၸုမ်းလႂ်ပူၼ်ႉပႅၼ် ။
ၼႂ်းႁၢင်ႈလိူၼ်ၵျူႊလၢႆႊ ၼႆႉၵူၺ်း ၵူၼ်းၸိူဝ်းၵႂႃႇဢႅဝ်ႇယဵမ်ႈလွႆပူၵ်ႉပႃး ၼႂ်းၸႄႈဝဵင်းၵျွၵ်ႉပတွင်း 11 ၵေႃႉ ႁၢႆဝႆႉ ထိုင်မိူဝ်ႈလဵဝ်။ ၶၢဝ်ႇတႄႉလိုဝ်းဝႃႈ ၺႃးၸုမ်းဢမ်ႇႁူႉၾၢႆႇတီႉၺွပ်းဝႆႉ ။ လွင်ႈၼႆႉ ပဵၼ်တီႈဢုပ်ႇတီႈလၢတ်ႈၼႂ်းၵႄႈၵူၼ်းၼႂ်းမိူင်းတႆးမႃး ။ ပေႃးၵႂႃႇဝႆႈၽြႃးတီႈၵႆ လူဝ်ႇလႆႈၾၢင်ႉၼၵ်းယဝ်ႉၼႆ ဢွၼ်ၵၼ်လၢတ်ႈၾၢင်ႉၵၼ်ၼင်ႇၼႆ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။
#ၽူႈတွႆႇႁွၵ်ႈ
#ShanNews