ၼႂ်းမိူင်းတႆးၼႆႉ ယႃႈမဝ်းၵမ် ယဵၼ်းပဵၼ်ၵၢၵ်ႇသေႃးတႃႇမူၼ်ႈသိူဝ်း ယဝ်ႉႁိုဝ်?
ၽူႈတွႆႇႁွၵ်ႈ ၊ ၸၢႆးသႂ်ၸိုၼ်ႈမိူင်း
မိူဝ်ႈၵွၼ်ႇပူၼ့်မႃးတႄ့ ၵူၼ်းႁဵတ်းတူင်ႈႁဵတ်းၼႃးၼႂ်းမိူင်းတႆးၵမ်ႈၽွင်ႈ ၵိၼ်ယႃႈမ သေ ထႅမ်ႁႅင်းတႃႇႁဵတ်းၵၢၼ်ၵၼ် ဢၼ်ဝႃႈၼၼ့် တေယၢမ်ႈငိၼ်းၵၼ်ယူႇ။ၼၼ့်ၵေႃႈ မိူဝ်ႈတႄႇ ၵိၼ်တႄ့ ႁဵတ်းၵၢၼ်တၢၵ်ႇလႅတ်ႇ တၢၵ်ႇၾူၼ် ဢမ်ႇႁိူဝ့်ဢမ်ႇဢူၼ်ႈ ဢမ်ႇလိုဝ်ႈႁိူဝ့် ၸႂ်ၶႂ်ႈလပ်းၶႂ်ႈၼွၼ်းၵေႃႈဢမ်ႇမီးၼႆ။
ဝၢႆးမႃးတႄ့ၵေႃႈ ထိုင်တီႈ ၸပ်းၸွႆးယဝ့်သေ ၵၢၼ်တႄ့ ႁဵတ်းဢမ်ႇႁဵတ်း ယဝ့်ဢမ်ႇယဝ့်တႄ့ဢမ်ႇသူၼ်ၸႂ် ၵုမ်ႇမိုင့် ၶႂ်ႈၵိၼ်ယႃႈမ ၼၼ့်ၵူၺ်းယူႇ။
လိူဝ်ၼၼ့် ပေႃးဢမ်ႇလႆႈၵိၼ်ယႃႈမ (ယႃႈယွင်ႇမႃႈ) မႃး မေႃၽိတ်းလုၵ်ႈၽိတ်းမေး ထိုင်တီႈ ၸႂ်လမ်တေႃးသဢွၵ်ႇသေ ၶႃႈႁႅမ် ပေႃႈမႄႈလုၵ်ႈလၢင်းၼၢင်းမေး တူဝ်ၸဝ်ႈၵဝ်ႇၶိုၼ်းၵေႃႈမီးတင်းၼမ် ပေႃးဝူၼ့်သွၼ်ႇတူၺ်းလီလီ ပဵၼ်လွင်ႈလီၵူဝ်တေ့တေ့။
ယႃႈမ ၼၼ့်ၵေႃႈ ၵူၼ်းၼႂ်းမိူင်းတႆးႁဝ်းပတ်းပိုၼ့်ၸေးၸွတ်ႇ သူင်ၸႂ်ႉၵၼ် ။ ႁဵတ်းႁႂ်ႈ ၼႃႈႁိူၼ်းလူ့၊ ပၢႆးမၢၵ်ႈမီးလူ့ ၊ ပၢႆးပၺ်ၺႃလူ့ ၵွပ်ႈမၼ်းမႃးၼႆ ႁူႉထိုင်ၵၼ်လီယူႇ။
ၵူၺ်းၵႃႈ မိူဝ်ႈလဵဝ် ဝႄႈပႅတ်ႈယႃႈမ လႆႈယဝ့်ၵမ်ႈၽွင်ႈ ဝႃႈၼႆသေတႃႉ ၵူၼ်းၼုမ်ႇႁဝ်း ၸိူဝ်းဢမ်ႇႁဵတ်းႁႆႈႁဵတ်းသူၼ်သင်သေ ႁဵတ်းၵၢၼ်ၼႂ်း ႁူမ်ႈဢွၼ်ႇၵူၺ်းၵေႃႈ သမ့်သူင်မိုတ်ႈ ယႃႈမဝ်းၵၼ် ဢၼ်ငၢႆးမိူၼ်ယႃႈမ ၼၼ့်မႃးထႅင်ႈၼႆ တႃႉလီ ၶေႃးၶူမ်ၸွမ်းၽဝပၢၼ်ပဵၼ်ၵူၼ်းမိူင်းတႆးႁဝ်းၼေႃႈ။
မိူင်းတႆးႁဝ်းပၢၼ်သိုပ်ႇပၢၼ် ပေႃးတေလႆႈလၢတ်ႈၼႄ လွင်ႈၶိုတ်းၵၢပ်ႈၶိုတ်းၸၼ့်ၼႆၸိုင် လိူဝ်သေ ပၢင်တေႃႇပၢင်လွင်းလႄႈ ယႃႈမ ယႃႈမဝ်းၵမ် ယဝ့် ဢမ်ႇသူႈမီးသင်။
#ၽူႈတွႆႇႁွၵ်ႈ
#ShanNews
